رمضان كريم

أنا رجعت ....
ورجعت معايا حاجات كتير
أهمها في اللحظة الحالية اللاب توب اللي انحرمت منه فتره طويلة لما انكسرت الشاشة بتاعته
كده أقدر اتواصل معاكم تاني
طبعا ماهو شهر مبارك
علينا وعليكم يا رب

كل سنة وانتم طيبين

.
.
.
.
.
.
.
.

لحظة صدق

,

.
.
.
.
.

تجارب الصدق التي نمر بها قد لا تكون جميلة احيانا

ولكن يكفي أن تكون صادقة

أعيش الآن أوقاتا تحتاج الى الصدق والأصدقاء والتصديق معا

أرجو دعائكم

,,

,

,
,
,
,
,

مجرد غريق

فوتوجرافيا: محمد الدسوقي

أنا أحمد اللي شفت الغريق وأنا بصطاد يوم شم النسيم

هو ده المكان اللي شفت فيه الغريق

ـ تعرفي يا ماما النهاردة شفت واحد بيغرق... طبعا انتي موش هتصدقيني .. لكن والله وانا بصطاد مع اصحابي شفت كل حاجة
ـ لا لا متخافيش احنا عشان صغيرين منزلناش المية ... كنا قاعدين على البر بنصطاد، والدليل على كده السمك اللي جبتهولك ده عشان تشويه.. أنا كنت عامل سنارة طويلة قوي عشان مقعش في المية
ـ حتى لو واحد من اصحابي هزر معايا ورماني في النيل زي ما بتقولي كان حد من قرايبي هينقذني
ـ كل اللي بتقولي عليهم دون ما كانوش من بلدنا .. محدش غرق من بلدنا قبل كده في المكان ده خالص .. بس بيقولوا ان البلد اللي قدامنا كل سنة يغرق منها واحد او اتنين في شم النسيم
ـ هما بيعرفوا يسبحوا بس محدش عارف ليه بييجوا في نص النيل ويغرقوا... بيقواوا إن فيه هناك جنية بتغرق الناس.. الكلام ده صحيح يا ماما
ـ أمال ليه بيغرقوا وهما متعلمين السباحة؟
ـ فعلا ممكن يكون تعب فجأة .. لأن اللي غرق كان قرب يوصل لبلدنا... وكان بيتسابق هو وصاحبه على اللي يعدي قبل التاني لحد عندنا
ـ موش عارف إيه اللي وقفه ، أنا كنت شايفه وهو بيعوم وبعدين فجاة غطس في المية وقب وقعد ينادي : يا علي .. يا علي
ـ معرفش مين علي.. لكن فيه واحد كان بتتبع مصدر الصوت وفجأة لما اتوقف الصوت رجع ومعرفش يعمل حاجة
ـ وهو آخر مرة قب فيها قام متكلمش .. بص حواليه في كل مكان براسه وهو ساكت خالص .. وقف كده يا ماما كأنه بيلف راسه في كل مكان وبعدين نزل ومطلعش
ـ طيب انتي بتعيطي ليه؟ إنتي خايفة عليا ؟
ـ أوعدك يا ماما لما أكبر موش هسمع كلام أي حد من اصحابي وانزل معاه المية
ـ لا محدش لحقه .. بس الصيادين ربطوا شباكهم كلها ورموها كثير ومعرفوش يطلعوه هما والغواصين.. أنا قعدت اتابع الموقف أنا واصحابي أربع ساعات وبعدين جيت
ـ زمان مامته بتعيط موش كده يا ماما

هما دول قرايبي اللي هينقذوني لو غرقت في أي وقت

.......................

ـ ماما فاكرة الولد اللي من البلد اللي قدامنا وقلتلك امبارح إنه غرق ؟
ـ ايوة لقوه .. الميس في المدرسة قالتلنا انه كان جارهم وإن علي اللي كان بينده عليه جاتله صدمة ودخل المستشفى في حالة غيبوة
ـ موش عارف بس ممكن يكون لأنه معرفش ينقذ صاحبه ولأنه كان بيتسابق معاه على مين يوصل الشط بتاعنا الأول فحس بالذنب
ـ أنا لغاية دلوقتي محتار زيك ... يا ترى لما قام آخر مرة وبص حواليه وهو ساكت ...كان يئس زي ما بتقولي ولا كان مندهش بس ولا مصدوم
ـ ممكن يكون فعلا فقد الأمل ويئس واستسلم لحقيقة إنه هيموت .. بس تعرفي يا ماما ... وهو بينده بصوت عالي على صاحبه علي كان نفسه يعيش
ـ ماما ... ماما .. مالك ؟ وشك أصفر كده ليه ؟ تيته .. الحقيني ماما وقعت على الأرض

هيا دي ماما اللي أغمى عليها وقعت على الأرض

موقع الكتابة العربية الجديدة

الهوة بين أنواع الكتابة في اتساع، ولا أحد يملك وحده مفتاح غرفة الحقيقة السحرية، أو يعرف طريقه. إذن ... فلنبحث عنه

بهذه المقولة افتتح المحرر الموقع الجديد الكتابة العربية الجديدة الذي يرأس تحريره الشاعر المبدع محمد أبو زيد

"وهذا لا يعني بالضرورة أنه سيكون مفارقا للأجيال السابقة، فمنها تعملنا ، ومفارقتنا لها ليس إلا تأكيد أنهم كتبوا شيئا جميلا يخصهم هم ، لكننا نحاول أن نكتب شيئا جميلا يخصنا نحن .

يحتوي الموقع في انطلاقته على تأكيد لهذا ، ستجدونه في ملف الكتابة الجديدة وفي الشهادات لعدد من رموز الكتابة من الشباب ، وفي نصوصهم ، ستجدونه أيضا في ملف آخر حول روائي من أكثر هذه الأصوات تميزا ، وهو هاني عبد المريد ، ستجدونه حتى في فكرة وجود باب خاص للتدوين ، وهو ما أعتبره في أحد تجلياته ، نوعا من الكتابة الجديدة ، بغض النظر عن مسماها ."

من كلمة المحرر

جهد رائع ومتميز ..

شكرا محرري العدد

شكرا رئيس التحرير

مبروك

وقعت في الفخ

وقعت في الفخ

رسوم: محمد عبد الله

ليست الحيوانات فقط !! نحن أيضا نقع في الفخ

نتعرض أحيانا لمواقف تجعلنا نشعر بأننا وقفنا في فخ لا مخرج منه

ترى متى تشعر بأنك قد وقعت في الفخ ؟

في. آي. بي

عمرو أشرف ابراهيم ( 9 سنوات ) أشعر بالفخ لما الناس يبقوا عاييزين يسلموا عليا وهما بيحبوني وانا موش عارفهم

قطر الندى: بيحبوك .. وانت موش عارفهم .. وعايزين يسلموا عليك؟! ممكن يكونوا معجبين بسيادتك وعايزين تمضي لهم علي اتوجرافات

إيمان محمد عبد النبي (12 سنة ) أشعر بالفخ لما أصحابي يجولي كلهم في وقت غير مناسب

قطر الندى: عندك حق كان لازم يتصلوا بالسكرتاريه عشان يخدوا ميعاد من حضرتك

الأخلاق الحميدة

محمد محمد فهمي ( 9 سنوات ) أشعر بالفخ لما أكذب كذبة واتكشف

قطر الندى: انت اللي غلطان موش عارف تداري عملتك ابقى درب نفسك على التمويه

سمر محمود ( 9 سنوات ) أشعر بالفخ لما اشتم حد بصوت عالي وألاقيه ورايا

قطر الندى: تشتمي حد بصوت عالي !!.. تستاهلي .. المرة الجاية ابقي اشتمي في سرك

أخ!!

سلمى اسلام ( 4 سنوات ماما ساعدت سلمى في الإجابة ) أشعر بالفخ لما قطر الندى تسألني أسئلة لا أجد إجابة لها

قطر الندى: طيب ما هي الإجابة التي لا سؤال لها ؟

أحمد خليل ( 10 سنوات ) أشعر بالفخ لما اتفاجئ بأصحابي عاملين لي عيد ميلاد

قطر الندى: محدش يعبره وسيبوبه لوحده من غير تورته ولا هدايا

أصحاب ولا ...؟؟

عبد الله حلمي خيري( 9 سنوات ) لما أكون أخذت من صاحبي كراسته ونسيتها في البيت وأسبب له في مشكلة مع الاستاذ

قطر الندى : هو فخ بصحيح بس لصاحبك موش لك انت، وعلى العموم عشان ضميرك مايتعبكش ممكن تاخد العقاب بدل صاحبك .

محمود عبد الواحد جاد الله ( 11 سنة ) أشعر بالفخ لما يبان عليا مشاعري اللي عايز أخبيها

قطر الندى: يا حرام مين اللي عذبت قلبك يا جميل

كلها أحلام

أشعر بالفخ أمل محمد حسين ( 11 سنة ) لما أكون بحلم

قطر الندى : ابقي اتغطي وانتي نايمة يا أمولة

محمد صبري اسماعيل ( 11 سنة ) أشعر بالفخ لما كنت بقف في طابور العيش

قطر الندى: طبعا فخ.. موش طابور عيش .. لو كان طابور لحمة كنت هتقول كل يوم من ده

لماذا يكذب الكبار

الكبار كذابين قويييييييي

الرسوم بريشة : محمد عبد الله
والفوتوجرافيا بعدسة : إسلام عواد

عندما قررت أن أسأل أصحابي سؤال العدد الجديد في مجلة قطر الندى خشيت أن يترددوا في الإجابة.. عندها قررت أن اقترح عليهم إخفاء المجلة عن عيني الكبار، ولكني بعد أن طرحت السؤال فوجئت بالكبار وقد تحمسوا للإجابة لدرجة أنهم ساعدوا أبناءهم على تذكر المواقف التي اضطروا فيها للكذب عليهم

هل تعلمون ما معنى هذا يا أصحابي؟

معناه أن باب الشمس مثلما يساعد الصغار يساعد الكبار أيضا في تقويم أنفسهم.

والآن لنبدأ التقويم:

متى أو لماذا يكذب الكبار؟

يعملوها الكبار

إلهام عصام محمد( 15 سنة ) يكذب الكبار لكي يخرجوا من مواقف محرجة

قطر الندى: و لما يتكشف كذبهم... بيكون موقفهم أكثر حرجا، وشكلهم وحش قوييييي

روان عبد الله السيد ( 9 سنوات ) لما يكونوا موش عايزين يردوا على حد غلس في التليفون ويقولوا إنهم نايمين

قطر الندى: إلى كل شخص عارف نفسه إنه غلس الرجاء الذهاب فجأة إلى بيت من يدعي النوم في التليفون.. هو ده أحسن عقاب لهم

الأختين الحلوين

* لبنى إسلام شفيق ( 7 سنوات ) بابا وماما بيكذبوا لما يكونوا عاوزين يقنعوا أختي سلمى بحاجة

قطر الندى: سلمى فقط لكن إنتي لأ .. لأنك عاقلة وكبيرة... موش كده يا لولو

هيا دي سلمى اللي مامتها وباباها بيكذبوا عليها

ودي لبنى اللي كشفت مامتها

وباباها لكل الناس

* مي عبد الواحد محمد ( 8 سنوات ) ماما بتكذب لما تقول لأختي ميار انها هتركبها التوكتوك عشان توافق تغير هدومها

قطر الندى: حلا لهذه المشكلة خلي بابا يغير المرسيدس لتوكتوك يا مي

وراك وراك

عبد الله حلمي خيري ( 10 سنوات ) لما يكونوا مسافرين وموش عايزين ياخدونا معاهم

قطر الندى: هو انت وراهم وراهم ؟ سيبهم ياخدوا نفسهم من غيرك يا أخي

آية طارق سيد ( 9 سنوات ) لما بابا بيقولنا واحنا في كندا سافروا مصر وأنا هاجي وراكم وهو ميجيش

قطر الندى: شوف انتي بتعملي إيه في بابا عشان كده ما بيصدق ويخلص منك

أحلى مر

محمد محمد فهمي ( 12 سنة ) لما ماما تقولي وأنا باخد الدوا إن طعمه حلو ويطلع مر

قطر الندى: تلاقي ماما عايزة تدوقك المر اللي بتشربو لها كل يوم.

البيت الذي سأسكنه

البيت الذي سأسكنه
نشرت في الثقافة الجديدة يناير 2009

بعد أربع سنوات، وربما خمس، سأسكن بيتا مصنوعا من الخشب. سيكون خارج الكتلة السكنية، حيث يتسنى لي أن أرى حقول الأرز في الصيف تكسو الأرض بلون أخضر فاتح، وفي الشتاء يكسوها القمح بالأخضر الداكن. وسأتسلى بمتابعة تغير لونها بالتدريج حتى تجف وتصبح صفراء، وربما يذكرني لونها الأصفر بالذهب اللامع، وقد يأخذني هذا إلى أغنية قديمة كنت أغنيها وأنا في طور المراهقة، سأتذكر هذا فأنساق إلى ترديدها بنفس الروح المثالية:
" يا اللي الذهب شعرك ..
مفرود على ظهرك ...
لو أمتلك مهرك ....
يضيء لي قنديلك ...
وربما أنشغل في ترديد أغنية أخرى يذكرني بها الضباب الذي يلف الحقول كل صباح، حتما ستتناسب الأغنية التي أختارها مع ما يلقيه الضباب في نفسي من شعور بغموض العالم، ونكهة الحياة . مثل :
الدنيا ريشة في هواء
طايرة من غير جناحين
واحنا النهاردة سوا
وبكرة هنكون فين
سأرددها وأنا أنظر إلى قباب المدافن التي تظهر من بعيد، ويغطيها الضباب فتكون باهتة الألوان، وسأستبعد قرب الموت مني وأنا أسكن بيتا خشبيا ليس كباقي البيوت.
سيكون البيت المصنوع من الخشب مثيرا للفرح، وأنا أنظر من نافذته العلوية إلى حدائق البرتقال التي تمتد خلفه من جهة الجنوب. وسأشعر بالبهجة وأنا أرى حبات البرتقال وهي تتلألأ كالمصابيح ليلا بين أوراق الشجر .
البيت الخشبي الذي سأسكنه سيكون مكونا من غرفة واحدة ،مثل الكوخ الكبير. وسيوحي للناظرين بأنه مخزن للتبن أو العلف، سيكون ارتفاعه سته أمتار حتى أتمكن من بناء سندرة علوية أصعد إليها بدرج خشبي ، وحيث أستطيع أن أرى المنزل بأكمله من فوق السندرة ، وأنا أستند على إطارها المصنوع من الخشب أيضا . ستشبه السندرة الشرفة العالية وهي تطل على المنزل من الداخل . وسأخصصها للنوم بعد أن أزودها بستارة من القماش السميك كي تحجب الضوء في الوقت الذي أرغب فيه بالنوم، سأفعل ذلك في وقت القيلولة فقط، أما في الصباح فسيحلو لي أن أصحو على ضوء الشمس وهو يتسلل من زجاج النافذة الشفاف مصحوبا بزقزقة العصافير. أعرف كيف أستدرج الطيور إليّ نافذتي، سأضع فتات الخبز كل يوم على حافتها العريضة، تلك التي سأجلس عليها ليلا لأتأمل النجوم وهي تلمع في السماء مثل حبات الماس، وسأغني وقتها الأغنية الإنجليزية التي كنت أفضلها وأنا طفلة :
أيتها النجمة الصغيرة اللامعة
كم أتتعجب منك
وأنت تطلين على العالم من فوق
تشبهين الماس أعلى السماء
سأتذكر كم كنت أغنيها بشغف.. أضحك وأنا أحرك يدي في حركة مرتعشة أقلد لمعان النجوم في السماء . سأفعل ذلك وأنا جالسة على حافة النافذة أحيانا، وأحيانا أخرى وأنا مستلقية في الفراش، أستعد للنوم تحت السقف المائل وأنا أراقب لمعان النجوم .
سيكون مكان النوم في الجهة الشرقية للبيت التي تعلو الباب مباشرة وفي الجهة الغربية ستكون السندرة الثانية التي سأصعد إليها هي الأخرى بدرج خشبي، والتي سأقضي بها أكثر الأوقات، حيث سأضع بها دولابا للكتب، وطاولة صغيرة عليها الحاسوب الذي سيأخذني إلى عالم أكبر اتساعا، وحتما سأجد به سبلا إلى مدن لا أستطيع أن أراها على خارطة الكون .
سأطهو الطعام في بيتي الخشبي أغلب الأوقات على نار المدفأة التي تجاور أريكة كبيرة، حيث سيحلو لي أن أجلس أمامها على الأرض ، مرتدية البنطال الجينز والسترة السوداء والشراب الوردي القصير . سأجلس على السجادة التي يتداخل فيها اللون الأحمر بالأسود، ألتمس الدفء من النار. أراقبها وهي تلقي بضوئها البرتقالي على جسدي وملابسي، وعندما تخبو سأقوم بشي الدجاج أو السمك، على جمرها في أمسيات الشتاء. أما في الصيف فسأصنع السلطة المحببة بالنعناع وزيت الزيتون، وسأطهو المعكرونة على الموقد الكهربائي الذي سأضعه في المطبخ أسفل السندرة الغربية، حيث أصعد إليه درجتين بعرض البيت، وسأضع به طاولة الطعام الدائرية التي سيمكنني دورانها من رؤية وجوه الأصدقاء الذين سأدعوهم للعشاء.
سأعتقد وأنا أعيش في هذا البيت، بعد أربع أو خمس سنوات أني سأستمتع بالسلام والهدوء حتى أموت، وأني سأنعم بالخلود الأبدي لو فقط قدر لي أن أدفن فيه.
بقي أن أبحث عمن يساعدني في بناء حلمي الخشبي مكان معلف الأبقار الذي يتوسط الحقول، والذي سأرثه ـ ربما ـ بعد أربع أو خمس سنوات .

ليالي قطر الندى / سحورة المسحورة في الساقية المشهورة

سحورة المسحورة والنظرة المجنونة

بلغني أيها الملك السعيد ذو العقل الرشيد أن سحورة المسحورة قد أقامت معرضا للصورة ، وأنها في كما يقول الراوي قد أقامت معرضها في ساقية الصاوي ....

سمير عبد العزيز .. ابراهيم البريدي .. فوزي مرسي
.. دهب .. ياقوت.. مرجان .. أحمدك يا رب

كما حضر العرس الفني الجميل أصدقاؤها من هذا الجيل .. ومن جيل السابقين من الرواد ، وجيل القادمين من البنات والأولاد

سحورة المسحورة وعبورة الشعنونة

ولا يخفى عليك يا مولاي أهمية من حضر من الأصدقاء مثل عبير الشعنونة التي تظهر في الصورة مع سحورة المسحورة

وقد حضرالأصدقاء والأهل والأقرباء دون جهد أو عناء .. وحضل كان الحفل المهتمين بالكتابة أو الرسم للطفل وبالأخص الحاصلون على الجنسية القطرية باعتبار الفنانة الندية فنانية قطرية هي الاخرى ( نسبة إلى مجلتنا العزيزة قطر الندى)
حتى جاز لنا ان نطلق على المعرض ليالي قطر الندى

ومن المؤسف يا مولاي أن سحر الخبيثة ذات النظرة المخيفة قد رفضت في ثبات أن تبيع لوحة من اللوحات ولما خافت من أسما المزعزمة صاحبة الحق المدعومة من أصدقائها الاخيار
ندمت على رفضحها الجارح فقررت التبرع بالصالح من لوحاتها الفنية للدور الخيرية
وذلك بدعوى جريئة بأن تدخل السرور على أطفال هذه الدور

رسائل من الدوحة

لمن لا يعرف قيمة التدوين

جرعة قاسية من الإنسانية

http://lettersfromdoha.blogspot.com/

فوتوغرافيا إلهام عواد

وصلني إميل من أختي التي تعيش في الرياض ... بعنوان شهر عسل يا تيته فتينه

بداية ظننتها تذكرني بجارة قديمة لنا كانت تعيش معنا في الرياض وكان اسمها فتينة

ولكني عندما فتحت الرسالة وقرأت محتواها عرفت أن الأمر لا علاقة له بالجارة

المنسية .. فقد وجدت به رابط لمدونة رسائل من الدوحة

لا أكتمكم خبرا اني اغتظت من أختي جدا وقلت في نفسي مالي ومال رسائل الناس من

الدوحة

ولكني بمجرد أن بدأت في قراءتها أدركت لماذا أرسلت لي أختي بها .

وعندما سالت دموعي أدركت أني أمام وجبة دسمة من الإنسانية .. لا تكفي مرة واحدة

لابتلاعها بأكملها

لمن تمزق ما بين وطنين

أم وأم بديله

أم ولدت وأم ربت

لمن يدين بالولاء لأماكن متضاربة أو أشخاص متنافرين..لا يقدر على الجمع بينهما

اقرأوا معي رسائل من الدوحة فهي حقا تستحق

يا كسوفي

متى تشعر بالخجل؟

قطر الندى : نحن نتحدث اليوم عن الخجل المطلوب .. ذلك الذي قد يعني أحيانا الحياء أو الكسوف . وقديما قالوا أن لم تستحي فاصنع ما تشاء، وقالوا : الحياء نصف الدين ، وفي المثل الشعبي اللي استحوا ماتوا ..ولكن !! ترى يا أصحابي متى يتحول الخجل إلى مشاعر مؤلمة ومصدرا من مصادر الضيق ؟

تعظيم سلام

سارا محمد الدسوقي ( 8 سنوات ) أشعر بالخجل لما ماما تقول للناس اني بعمل ببي في السرير بس اوعي تنشري الكلام ده ولا اقولك موش مهم انشريه
قطر الندى : صراحتك تستحقي عليها نيشان، ولكن هل هي جرأة أم عدم اكتراث؟ (( بيني وبينك موش خايفة اصحابك يقرأوا المجلة وينكشف المستور))

آباء مزعجين

سلمى اسلام شفيق ( 4سنوات ) أشعر بالخجل لما أكون في فرح وبابا ياخدني يعرفني على كل الناس
قطر الندى : أمال بقى لو كنت عروسة كنت هتعملي ايه؟
محمود طارق السيد ( 11 سنة ) أشعر بالخجل لما بابا يهزأني قدام أصحابي
قطر الندى : المفروض إن بابا هو اللي يشعر بالخجل يا محمود موش انت (( طبعا انت لن تخبر بابا بما قلته كي لا يرسلنا معا وراء الشمس))

عفاريت آخر زمن

ايمان محمود أمين ( 7 سنوات ) يشعر الأطفال بالخجل لما يكون عندهم ضيوف
قطر الندى : أشك في كلامك يا إيمان فالمتتبع لحالات الضيافة يلاحظ أن الأطفال ياخدوا راحتهم جدا لما يكونوا عندهم ضيوف
نورا أحمد عبد المنعم ( 13 سنة ) أشعر بالخجل لما أروح أزور واحدة صاحبتي وأكتشف انه يوم عيد ميلادها وأنا مجبتش معايا هدية
قطر الندى : اممم.. هل انت متأكده من أنك لم تكوني على علم بتاريخ ميلادها .. على العموم أنا اعذرك فالأسعار أصبحت مرتفعة جدا هذه الأيام

ياكسوفي

لبنى اسلام شفيق ( 7 سنوات ) اشعر بالخجل لما حد كبير يقولي تتجوزيني
قطر الندى : أكيد بطيري من الفرح لما حد صغير يقولهالك
بسملة طارق بدوي ( 8 سنوات ) أشعر بالخجل لما أكون في رحلة لقلعة قايتباي وحد من الأجانب يقولي : هالو
قطر الندى: كل ده عشان كلمة هالو ؟ أمال لو سألك هاو آر يو كنت عملتي إيه أكيد كان هيغمى عليكي من الكسوف

يا للعار

شريف عبد العزيز ( 11 سنة ) أشعر بالخجل لما أخلع الحذاء قدام حد ويطلع منه رائحة سيئة
قطر الندى : معلومة لجميع أصحاب الأحذية ذات الرائحة الكريهة .. ضع الحذاء في كيس محكم وأغلق عليه الثلاجة لمدة يوم واحد .. ستتخلص من رائحته لمدة اسبوعين .. (( بس اوعى تنسى وتفكر انه فرخة مشوية ))
يارا محمد الدسوقي ( 9 سنوات ) أشعر بالخجل عندما يسخر منهم الآخرون
قطر الندى : يا سلام وانت بتعديها كده من غير ما تاخدي حقك طيب فين الشقاوة والإجرام والأسلحة الأخرى

أكره النقود

content="text/html; charset=utf-8">

مجلة قطر الندى عدد 346 ... الأحد 27يوليو 2008

متى تكره النقود

الصغار: لا تبالغي يا قطر الندى .. أسئلتك المعكوسة لا يمكن أن تطال النقود فنحن نحبها مهما جرت علينا من ويلات، جميعنا نحب النقود ولا يمكن أن نكرهها في يوم من الأيام

قطر الندى : أنتم لا تصدقوني ؟ حسنا.. اقرأوا معي الأسطر القادمة وسوف تغيرون رأيكم في الحال

دلع صغار

هدير عبد العزيز ( 8 سنوات ) أكره النقود عندما تحقق لي ماما كل طلباتي

قطر الندى : لن يرضي ماما يا هدير أن تكرهي النقود لذا حتما ستستخدم معك سياسة جديدة بعد قراءتها لهذه السطور

بنطلون واحد

أحمد محمد مصطفى ( 12 سنة ) أكره النقود لأن جيبي مقطوع وأضطر أن أمسك بها طوال مدة لعب الكرة

قطر الندى: طبعا أنت لا تملك غير بنطلون واحد .. لذا أقترح عليك أن تحفر حفرة تخبي فيها الفلوس وعندما تعود إليها يمكن أن تكون قد كبرت وطرحت نقودا أخرى

عبد الله محمد ( 9 سنوات ) أكره النقود عندما تكون معي وأنفقها كلها في أشياء لا تسعدني

قطر الندى : هذا ذنبك وليس ذنب النقود .. المفروض تكره نفسك موش تكرهها هيا

عطر لكل جنيه!!

طارق راجح ربيع ( 7 سنوات) أكره النقود لما تكون ريحتها وحشة

قطر الندى : نداء .. نداء .. نداء إلى جميع القراء.. الرجاء شم النقود قبل إنفاقها وإذا لم تعجبكم رائحتها ألقوا به أمام باب قطر الندى .. ( في سلة باب الشمس طبعا )

نقود شريرة

سيف محمد ( 13 سنة ) عندما أحتاجها ولا أجدها فأشعر بأنها تتحكم بي

قطر الندى : ماذا ؟! تتحكم بك ؟! أما نقود شريرة بصحيح، خاصمها يا سيف وعندما تأتي لتصالحك ارفضها وبشدة

عيني في عينك

يوسف منتصر القفاش ( 7 سنوات ) أكره النقود عندما آخدها من شخص لا أحبه

قطر الندى : انت موش محبكها شوية يا سي يوسف ؟ طيب ما الذي يجبرك على أخذها ممن لا تحب ؟! رجعهالو لو كنت شاطر

ثقيلة جدا

نورهان محمد السيد ( 11 سنة) أكره الفلوس لما تكون من الحديد

قطر الندى : أنت إذن لا تعرفي الحكمة من صنع النقود من الحديد ؟! إذا كنت لا تعرفين فاسألي البخيل الذي بلط بيته كله بالرخام كي يسمع صوت القروش عندما تقع على الأرض ها..ها ..ها

صلاة محمد أبو زيد

صلاة الخوف / الشاعر محمد ابو زيد

http://mohamedabuzaid.blogspot.com/2008_09_01_archive.html

يا أيها المزمل
الخوف شلل وانت اللي مزّمِّل
هذا الطريق واعر صعيب
راح تمشي وتْكَمِّ
لولا ح ترجع للوجل تبكي وتتجمل
قبل الدخول رتِّل
يا أيها المزمل

البحر واخدني لموجة ف إثر موجه
والشط مش غازل أمل
عوجه وعصايتي مش
عصافيري طرشه زي انا برضه
ما بسمعشي ندا غير الوطن يصرخ من
الحوجه وبيهمل
يا أيها المزمل

هذا الوطن ساب العيون وْ هَْج
قلبي وقت امّا صحي وانا
اترج منُّه رج
طالع لفوق سابع سما
نازل لسابع فج
اللمون خاف فانطفى وعد
والنور رفض يرجع يفج
محج هو البكا يا عين دوا يرجع لي أوطاني
ولاسلاحي اللي دبل
ولا هعاود للسرير الدافي واتزمل
يا أيها المزمل

صلوا على خير الأانام
أنا طه جاني في المنام
خلص الكلام
والنور حمام
رفرف في وشك يانبي
غرقني ضيّك في هواك
رجعني من تاني صبي
ضحك الصباح لما التقى نورك بيرمح في الفضا
بيوضي مطرح ما خطا
سجد المدى
شكرا لرب الكون لإنه أبصرك
نادى عليك : ما أجملك
ما أطهرك
وناديت أنا:
قتلوا البراق اللي حِبِل شمسين ليا
سكروا بدموع الأوليا
طفوا تاريخ الأنبيا
فوق الشفايف
أما أنا
أنا اللي خايف
مني أنا
جسمي طليق والخوف أنا
الخوف حيطان جوايا تتهدّش
الخوف وطن وسجون ما تتعدش
الخوف خرس تسمع وما تردش
الخوف قانون حدِّشْ يِكَلِّم حَدِّش
ْالخوف بيتفتش
أنا أعمى لكن شايف
........أنا
أنا خايف .....
نظر الرسول وطول النظرات .. بِعِدْ عني
وجريت عليه
كان نفسي لو آخده في حضني
نفسي يجاوب مطلبي
نفسي أقوله يانبي
دثّرني زمّلني
كمان رقيني واحميني
كمان انصحني علمني
دنا جسمي بدا ينمل
قال الرسول اوعاك تخاف اوعدني تتحمل
اقرا ياسين وسورة المزمل
رتل ورايا وبعدي كمل
يا أيها المزمل


يا أيها المزمل
قم من فراشك ..ليه تخاف
جبريل أتى بالوحي والأعراف
أصرخ في مكة الله أكبر
كل الآيات حواليك أهي تتشاف
انظر لتتأم
ليا أيهاالمزمل
أهجر كهوف خوفك
اوعى البكا يشوفك
علق مشانق للعيون اللي بتبكي في الصحا والنوم
بكفايه نوم
امتى بقى هنقوم
يا أرضنا يا تمر حنة
إي والنبيدنا نفسي أتحنى
لمي غنا نايك على شفتك
هيا اسمعي راح اقول على إسمك
على صفتك
ضحك البلابل قد طرح مواله جوايا
يا أحلى محكايا
إديني حكّيوه
واديكي غنيوه
عن حلم جوايا بيتجمل
وعنيه هترتل
يا أيها المزمَّل

إوعى تخاف تأمل
يا أيها المزمِّل
إنهض وقوم كمل
يا أيها المزمل

حقوق الفئران

مجلة قطر الندى عدد 345 ... الأحد 13 يوليو 2008

ـ ستسألوني لماذا الفأر والفأر بالذات لماذا ليس القطة أو الكلب أو الحمار ؟!
لقد أطل علينا يوما الأستاذ سمير عبد الغني بصلعته المهيبة التي تدل على كونه فنانا متميزا وحكى لنا كيف أنه التقى بفأر كان يبكي وهو مقدم على الإنتحار، ولما سأله عن السبب اشتكى له الفأر من الظلم الذي وقع عليه وعلى بني جنسه بسبب البشر اللذين ينظرون إليه نظرة اشمئزاز واحتقار
لقد نظر إلي ذلك الفنان نظرة يتطاير منها الإصرار والغضب وسألني: متى يرفع الظلم الذي وقع على هذا الحيوان الصغير طوال السنين ؟ ثم دق بقبضته الطاولة دقة تحركت لها الأكواب والفناجين حتى أن القهوة السمراء قد انسكب جزءا منها على الأوراق البيضاء التي بجوارها ثم قال بنبرة لا تخلو من التهديد :
ـ أنت وأصدقائك من الأطفال مسئولون على إعادة الكرامة لهذا الكائن الجميل .. عليكم أن تقوموا بهذا و إلا ....
الصغار: وإلا ماذا يا قطر الندى؟ ماذا لو لم نستطع أن نرضي السيد المحترم الأستاذ فأر صديق الأستاذ سمير عبد الغني ؟
قطر الندى : أووووه أنتم لا تعرفون .. يمكن أن يغضب غضبا ينمو له شعر رأسه من جديد ونفقد بهذا الصلعة المهيبة التي توحي لنا بالكثير من التفكير والتدبير
كما يمكن لغضبه أن يطول عمله مع الأطفال فيعتزل الرسم والكتابة لهم ، وربما ..
الصغار : ماذا ؟
قطر الندى: ربما يدخل في حالة اكتئاب تؤدي به الى تمزيق كل ما قدمه لهم من قبل
وقد يتطور الأمر فيعتزل الفن وينشئ جمعية لحقوق الفئران مكرسا لها حياته إلى الأبد.
هيا يا أصحابي لنتجنب كل هذا ونبدأ في استرضاء سمير والفأر

ترى لماذا الفأر حيوان جميل ؟
ماذا لو كنت فأرا ؟

عيال في عيال

طارق راجح ( 8 سنوات ) أحب الفأر لأنه يسعدنا في برامج الكرتون ونحن نتابع مغامراته مع القط
زياد أشرف ( 5 سنوات ) أحب الفأر لأنه ميكي ماوس
قطر الندى : كرتون وميكي ماوس !!! أما عيال بصحيح

طبيب وحكيم
أحمد مصطفى محمد السيد ( 12 سنة ) أحب الفأر لأنه برجي الصيني وهو يدل على الصدق والصراحة والشفافية
قطر الندى : يا سلام .. على الحكمة، يا ترى بتتعامل مع أصحابك بنفس العقل ده؟
مها ابراهيم عبد العزيز( 14 سنة ) الفأر جميل لأنه يعلمنا معنى التضحية فهو يضحي بحياته من أجل علاج البشر عندما نجري عليه التجارب
قطر الندى : إمم .. أنت تحبين التضحية ما رأيك أن تضحي أنت الآخرى وتقدمى نفسك طواعية للعلماء

جوع وشبع

سماح مأمون إبراهيم ( 10 سنوات ) الفأر مفيد لأن الصقور والنسور تأكله ولولاه لماتت من الجوع
قطر الندى : حسنا ما رأيك في وجبة فاربرجر مع الكولا والبطاطس
وليد محمد محمود ( 8 سنوات ) أحب الفأر لأنه أنقذ الأسد عندما وقع في شبكة الصياد
قطر الندى : لقد أوحت القصة للقراء بأن الأسد عفا عن الفأر والحقيقة انه رأى أنه لا يكفي لبلعه واحده

فار ستار
أحمد على دنقل ( 9 سنوات ) كنت أمثل مع توم وجيري وأكسب فلوس كثير
قطر الندى : مفيش حاجة لوجه الله ابدا ..كله فلوس فلوس؟! مفيش دهب خالص
لو كنت فأر كنت هضحك قوي
قطر الندى : يا ساحرة يا طيبة حولي لفأر عشان تفضل مبسوطة على طول

إجرام

مصطفى راجح ربيع ( 7 سنوات ) كنت أخوف كل الناس
قطر الندى : يا سلام على قلبك الأبيض !!! موش كفاية الكوارث اللي حوالينا في كل مكان؟
حسين جمال محمد ( 11 سنة ) كنت أغيظ كل القطط واعاندهم واجري وراهم
قطر الندى : و بعدين !؟ بلاش تغلط في القطط لحسن يطلع لنا واحد تاني يقوللنا حقوق القطط والعفاريت

مصطفى حسن ( 11سنة ) كنت عملت اعلان في جريدة ابحث فيه عن قطة صغيرة تشاركني حياتي وكان شكلي هيبقي وحش اوي قدام اصحابي
قطر الندى : موش مهم اصحابك المهم انك هتكون قائد مبدأ المؤاخاة بين الفئران والقطط، عموما انوي انت بس والمأذون من عندي ..

يا لذيذ يا رايق

أحمد مهنى عبد العزيز ( 14 سنة ) كنت أحفر أنفاق تحت الأرض وادخل منها لكل بلاد العالم من غير فيزا أو تذاكر
قطر الندى : إيه من غير فيزا ولا تذاكر انت فاكرها سايبة ولا إيه ؟ لو اتقبض عليك هتدخل مصيدة الفئران الدولية

هناء عاطف محمد أحمد ( 8 سنوات ) الفأر جميل لأن نانسي عجرم بتحبه وبتغني معاه
قطر الندى : عنينا لنانسي ..الناس كلها عايزة تبقى فران مدام فيها نانسي عجرم.. يا رب تكون مبسوط يا أستاذ سمير