الثلاثاء، سبتمبر 29، 2009

أسبوع أجازة وفايزة وثلاثة أعياد ميلاد


أسبوع اجازة وفايزة وثلاثة أعياد ميلاد



كل سنة وانتو طيبين وأنا كمان طيبة معاكم

موش بس عشان العيد لكن كمان عشان عيد ميلادي

عيد ميلادي كان غريب السنة دي

عمركو شوفتو حد يتعمل له عيد ميلاد ثلاث مرات ؟

أنا طبعا

والموضوع ده حير ناس كثير

الحكاية بدأت من أول ما صاحبتي فايزة عملتلي عيد ميلادي وعشان يبقى مفاجأة عملتهولي
قبلها بثلاثة أيام يعني يوم 13 سبتمبر مع انها عارفة انه يوم 24 سبتمبر والحقيقة انه مكانش
24 سبتمبر بل كان يوم 17

المهم ان اللي عارف تاريخ ميلادي الأصلي قالى كل سنة وانتي طيبة يوم 17 وأول من
هنأني به بالطبع كانت ماما اللي شايلالي الجميل لأني كنت سبب في الأسبوع الاجازة
الزيادة الي خدتها من الشغل . ويبدو ان الشغل أيامها كان دمه تقيل قوي لدرجة انها زورت
تاريخ ميلادي عشان اسبوع واحد بس ...يعني طلعتني من برج العذراء للميزان مرة واحدة
وده خلاني واخدة من البرجين سوا.

كل ده وفايزة فاهمة انها الوحيدة اللي مهتمة وبتفكر فيا

لكن لما قرأت رسالة ماما عرفت إن فيه حد تاني مهتم بيا

ولما راحت معايا رحلة الفيوم يوم 24 سبتمبر ولقت صاحبتي ولاء جايبالي حاجة حلوة
عرفت ان العدد زاد

ولما اتصلت بيا بسنت من حلوان وأختي الهام من لندن ،ولما أخويا إسلام جابلي تورته يوم
26 وعملهالي مفاجأة عرفت ان الموضوع خرج من إديها

وفي النهاية حبت تكون هيا المنتصرة والفائزة قالتلي:
ـ ولو أنا اول واحدة قالتلك كل سنة وانتي طيبة

كل سنة وانتي فايزة بقلبي وقلوب ناس كثيرة يا فايزة