أكره الحياة في قطر الندى

مجلة قطر الندى عدد 351 ....الأحد 24 أغسطس

قطر الندى : الحياة .. هذه الجميلة..الممتعة.. الحلوة ..المفرحة .....
الصغار : هيه .. هيه .. توقفي يا قطر الندى ليس دوما تكون الحياة جميلة ألا تشعرين أحيانا بأنك تكرهين الحياة ؟
قطر الندى : جميل يا أصحابي لقد أوحيتم لي بسؤال هذا العدد:

ترى متى تكره الحياة؟


أختان وضدان
غادة محمد الدسوقي ( 13 سنة ) أكره الحياة عندما تكون هناك مشاكل في البيت وأكون مظلومة
قطر الندى : طيب لما بتكوني ظالمة بيحصل إيه ؟ أكيد بابا وماما هما اللي بيكرهوها وبيكرهوا نفسهم كمان
يارا محمد الدسوقي( 10 سنوات ) أكره الحياة لما ميكونش فيها ماما وبابا
قطر الندى : يارا هي أخت غادة .. حسنا أصدقك يا يارا ولكن بيني وبينك موش بتحسي بانطلاق لما ماما وبابا يخرجوا من البيت ؟!

نعيش لمصر
محمود عبد الواحد محمد ( 9 سنوات ) لما أكون مسافر برا مصر
قطر الندى : رجالة وطول عمر عيالك يا بلدنا يا رجالة ، وغلاوتك يا بلدنا والله موش محتاجة قواله


شقاوة تفوت
عبد الرحمن محمد عبد الرحيم ( 6 سنوات ) أكره الحياة لما تكون رجلي مكسورة
قطر الندى: وهو رجلك هتتكسر كل يوم؟ هيا شوية شقاوة وتروح

كلكو عليا ولا إيه
الهام عصام محمد ( 14 سنة ) لما حد بيزعقلي
قطر الندى : على كده هتفضلي كارهة حياتك على طول
مصطفى أحمد فتحي ( 12 سنة ) لما كل الناس يكرهوني
قطر الندى : المفروض تكره نفسك لما كل الناس يكرهوك، ذنبها إيه الحياة عشان تكرها؟



بريد باب الشمس

السؤال : ماذا لو كنت فأرا؟
اسماعيل يحيا السيد (10 سنوات ) لو كنت فأر كنت أسن سناني كل يوم عشان أعرف أقرقض كل شيئ

أحمد السيد جاد الله ( 11سنة ) كنت اقرقض هدوم الناس عشان أصنع منها هدوم ليا
قطر الندى : أما فئران مجرمة بصحيح
( ملحوظة: الرجاء إخفاء هذه الإجابة عن أعين نصير الفئران الفنان سمير عبد الغني كي لايحاسبنا عليها )

توبة أروح المصيف

توبة أروح المصيف

مجلة قطر الندى عدد 350 ....الأحد 17 أغسطس2008

الصيف .. الحرية.. والإنطلاق
المصيف .. البحر.. والرمل ..والهواء
ولكن بالرغم من كل هذا أنزعج من المصيف أحيانا يا أصحابي ..هل توافقوني ؟
ترى ما الذي لا تحبه في المصيف

منتهى التفاؤل
منى طارق عبد الواحد ( 11 سنة ) إن الناس ممكن تغرق في البحر
قطر الندى : ولكي لا يحدث لك هذا يا منى أقترح عليك أن لا تذهبي للصيف أبدا
مصطفى أحمد عزيز( 10 سنوات ) لا أحب في المصيف أسماك القرش
قطر الندى : أسماك القرش!! إنت بتتفرج على أفلام رعب كثير ؟

سكر زيادة!!
ندى وائل خليل ( 7 سنوات ) لا أحب في المصيف الملح اللي بيخلى جسمي طعمه وحش
قطر الندى : كيلو سكر نحل بيه مشكلة ندى ..الطريقة : ذوبي السكر في لتر ماء وادهني بيه جسمك قبل ما تنزلي البحر ..
أحمد محمد عادل ( 12 سنة ) إن مفهوش كمبيوتر في الشاليه
قطر الندى : لاب توب صغير يحللك المشكلة يا جميل . ابدأ بتحويش مصروفك من الآن


عنصرية !!
باسم محمود عزت ( 5 سنوات ) أكره في المصيف الناموس اللي بييجي ورانا عشان يقرصنا
قطر الندى : يا سلام يا باسم ..هو الناموس موش من حقه يصيف هو كمان ولا إيه ؟
سارة وائل خليل ( 4 سنوات ) إن تيتا موش بتيجي معانا
قطر الندى : طبعا لازم تيته متجيش معاك .. دي فرصتها الوحيدة عشان تريح دماغها من الشقاوة والعفرته

كسل
ولاء مصطفى ( 13 سنة ) ان الهدوم بتتوسخ بالرمل كل يوم
قطر الندى : رمل !! ياي .. إوعي تروحي المصيف الوحش ده تاني
يوسف محمود خطاب ( 11 سنة ) ان الشاليه مفهوش ستاير على الشباك ولما الشمس بتطلع بتصحينا غصب عننا
قطر الندى : يا أخي مفيش ستائر على الشباك حط انت ستائر على عنيك


مي عبد الواحد ( 9 سنوات ) قنديل البحر لأني بخاف منه جدا
قطر الندى : موش عارفة مين اللي سماه قنديل؟؟ ده بيسود الدنيا في وش أي حد يقرصه
نوال طارق محمد ( 9 سنوات ) إن جلدنا بيتقشر
قطر الندى : عادي يا نوال . الثعابين بتغير جلدها مرة كل عام